Rumenige: Duhet të fitojmë Champions

Bajerni i Munihut dhe Borusia e Dortmundit, dy ekipet më të mira të Bundesligës gjermane, do të përballen më 25 Maj në “Wembley” të Londrës në finalen e Ligës së Kampioneve të Europës, për të diskutuar kështu trofeun më të rëndësishëm Europian të Futbollit. Kjo mbrëmje do të jetë magjike, nisur dhe nga gjendja e mirë fizike e teknike e të dyja skuadrave, por edhe nga deklaratat pompoze që kanë bërë të dy kampet, duke thënë se gëzojnë të drejtën  e të qenit favorit për trofeun. Në tërësi Bajerni shihet si pretendent kryesor, por Borusia e këtij sezoni ka treguar se di të mundë dhe skuadrat më të mëdha të kontinentit. Të gjithë presin një sfidë shumë të vështirë, por edhe spektakolare, duke u përqendruar më së shumti te bavarezët, të cilët, shkojnë në këtë finale për herë të tretë në katër vjetët e fundit. Për ta kjo është një finale e veçantë, nisur dhe nga fakti se nuk duan të zhgënjejnë më tej, pra e duan trofeun.

Karl-Heinz Rumenige nuk ka dyshime, se Bajerni i Munihut e meriton suksesin në finalen e Londrës në 25 Maj. Bavarezët nuk e shijojnë suksesin në Champions League që prej 12 vjetësh dhe në finalen e tretë brenda pak vitesh nuk dëshiron të dështojë pasi kjo do të rezultonte një disfatë e vërtetë për ekipin e drejtuar nga Jap Hejnkes. “Duam ta fitojmë finalen e tretë me çdo kusht sepse ky trofe është gjithçka për ne. Ekipi ka punuar shumë gjatë 5 viteve të fundit dhe besoj se e meritojmë të shpallemi fitues”. Me rekordin e fitores së Bundesligës 6 javë përpara fundit, Bajerni i Munihut po zhvillon një sezon fantastik sepse në 1 qershor e pret edhe finalja e Kupës së Gjermanisë. Rumenige beson se djemtë e drejtuar nga Jap Hejnkes meritojnë të mos e mbyllin sezonin me vetëm një trofe. “Ky ekip mund të hyjë në histori dhe shumë shpejt do të dalë nga hija e skuadrës legjendare të viteve ’70. Me mbërritjen e Pep Guardiolës në stol nuk do të ndalemi sepse do të kërkojmë të fitojmë më shumë”. Duke u përqendruar te trajneri i ri, shefi ekzekutiv i bavarezëve përgënjeshtron zërat për një çështje që po përflitet shumë shpesh kohët e fundit, atë të Roben. “Arjen ka një kontratë me ne dhe për mendimin tim e ardhmja e tij nuk përben çështje”.

Në fund, Rumenige përforcoi fjalët e thëna pak ditë më parë, duke pohuar se ndihet mirë kur dëgjon që Riberi kërkon të zgjasë kontratën që skadon në vitin 2015.