Përplasje hajdutësh dhe populli në mes

Getoja Shqipëri, me politikë vemje e me popull kavje, që vazhdon lejon bandat PS, PD, LSI të eksperimentojnë, të cilat prej 27 vitesh, kanë shkaktuar qëllimisht e po përdorin, varfërinë ekstreme dhe pushtetin që ndajnë e ndërrojnë në çdo 4 vite, duke vazhduar sundimin dhe pasurimin e tyre, ndërsa shqiptarët masakrohen e vriten barbarisht si turma gladiatorësh skllevër, në sheshet që 4 “familjet mbretërore”, i kthejnë në arena përleshjesh argëtuese mes të varfërve të vjedhur

Tirana është mbushur plot, nga njerëz që kërkojnë punë, që kërkojnë drejtësi, ndërsa Vlora po mbushet plot, nga “ushtria e gazermës” shtëtërore, me punonjës e familjarë të tyre, që kanë frikë se humbasin punën, bukën e mini-privilegjet.

Në Vlorë, po manifeston kryeministri Rama dhe pushteti, në Tiranë po protestojnë berishët, metajt, bashët, kryemadhët dhe opozitarët, njëra palë për të mbajtur pushtetin që po e shijon, ndërsa pala tjetër, për të rrëmbyer pushtetin e humbur, që ia di shijen.

Në mes “paradës” qeveritare në Vlorë dhe babëzisë së opozitës në Tiranë, pra, mes dy bandave hajdute, qëndron i vjedhuri, populli që prej 27 vitesh, po vuan këtë ndeshje “keçi” mes palëve politike, të cilat, pasi e nxjerrin në sheshe, i uzurpojnë reagimin, urrejtjen, lëvizjen masive, duke e përdorur në favor të sundimit të tyre.

Në 24 orët e fundit, të dy bandat e hajdutëve PS dhe PD-LSI, po akuzojnë njëra-tjetrën për vjedhje, pasuri krimi e korrupsioni, duke përmendur vila në Shqipëri, në bregdete e ishuj përrallorë të botës, biznese, orgji, saraje, shkollime fëmijësh në SHBA e Angli, lidhje me oligarkë e trafikanë, pushime luksi, vrasje në potesta e fabrika trafiku municionesh, llogari bankare e banka private.

Së bashku, por të ndarë ne çeta hajdutësh, kanë bërë batërdinë në këto 27 vite, duke zhvatur pasuritë kombëtare e personale të shqiptarëve. Janë miliarderë të pangopur, që përledhen për mbrojtjen e pasurive dhe presin për t’i shtuar ato, nëpërmjet pushtetit.

Ndaj po ulërijnë si çakejt në pyll për “gjahun” pushtet, të cilin “tufa” Rama e ka kapur dhe nuk lëshon, ndërsa “tufa” Berisha-Metaj-Basha-Kryemadhi, duan t’ia përlajnë, siç përlahen thelat në kacafytje “qensh”.

Çdo gurë, vezë e bojë, që ata hedhin në surratin e njëri-tjetrit, e veshin me fjalën “interesi i popullit”, duke folur vetëm në emër të tij në parlament, në televizione e në “FB”, por ndërsa vetë jetojnë në luks, populli ka lista në furrat e bukës.

Bëjnë sikur qajnë, për fëmijët e shqiptarëve, por miliardat dhe pasuritë i stivosin për fëmijët e tyre. Flasin për papunësinë e shqiptarëve, por bëjnë ligje, vetëm për pagat e tyre milionëshe e priviligjet e shumta prej SHEIK-ësh. Flasin për luftë kundër korrupsionit, por ata, janë vetë hajdutët, të ndarë në çeta.

Midis tre bandave hajdute, vrasëse, trafikante, anti-shqiptare, pronare faktike të këtij vendi, që ndahen e bashkohen për pasuri, që nuk ndëshkojnë asnjë prej hajdutëve të tyre, po sillet vërdallë populli, i cili prej 27 vitesh, hidhet si “top lecke” nëpër sheshe me mitingje e duartrokitje të 4 familje-bandave PS, PD, LSI, po çohet me miell e pagesa në qendra votimi, po rrihet e vritet në protesta për prej tyre e për interesat e tyre./Pamfleti