Çmimi Nobel për Paqe

Liderët e tre institucioneve kryesore të Bashkimit Europian kanë pranuar edhe formalisht Çmimin Nobel të Paqes 2012.

Presidenti i Këshillit Europian, Herman Van Rompuy, presidenti i Komisionit Europian, Jose Manuel Barroso dhe presidenti i Parlamentit Europian, Martin Schulz pranuan çmimin në emër të unionit prej 27 vendesh anëtare.

Në një ceremoni solemne të organizuar në Oslo, kryesuesi i Komitetit të Nobelit, Thorbjoern Jagland, prezantoi çmimin, duke theksuar rolin e BE-së në ruajtjen e paqes në kontinentin evropian, i cili mbijetoi edhe dy luftëra, transmeton Rel.

Kritikët e këtij vendimi thonë se Bashkimi Europian, është duke ecur nga kriza në krizë dhe vendimi si i tillë nënçmon vetë çmimin.

Ndryshe, çmimi këtë vit kap shumën prej 930 mijë eurosh dhe paratë do të investohen në projekte që ndihmojnë mbijetesën e fëmijëve në zona lufte.