Pranga në ditën e lirisë !!!

Gëzim Podgorica

Në fakt kur kam dëgjuar lajmin më është mekur zëri dhe më është marrë fryma. Nuk kam dashur ta besoj se në ditën e lirisë e të çlirimit të Kosovës, arrestohet një nga simbolet  e rezistencës paqësore, një nga figurat ekskluzivisht  me të pastra , më patriote dhe më të përkushtuara: Albin Kurti ! Nuk kam dashur kurrsesi ta besoj. Por tragjikisht kjo rezultoi e vërtetë.  Një e vërtetë shumë e dhimbshme, fyese tejskajshmërisht kur mendon se si  mund të abuzohet e mund të përdhoset liria  e një  simboli të lirisë, pikërisht në  ditën kur ajo  përkujtohet. Gjasme  më 12 qershor  është folur për çlirimin e Kosovës, por asnjë nga ata që kanë folur nuk ka guxuar të thotë një fjalë për Albin Kurtin, njeriun që më së paku ka merita më  tepër se  shumica e atyre që kanë mbushur akademitë përkujtimore, pse jo edhe  atyre që  kontrabandisht janë ulur në poste ministrore apo karrige të tjera të larta pushteti.  E them këtë jo vetëm për  atë çfarë i  ka kontribuar lirisë së Kosovës Albini, por edhe  formimit e performancës së tij të veçantë e drithëruese intelektuale.

E ndjek prej vitesh shtypin me shumë vëmendje, ashtu si edhe komentet e ndryshme. Asnjëherë në jetën time nuk kam parë reagime më të shumta në blogjet e ndryshme  më shumë se kësaj radhe. Asnjëherë nuk kam parë kaq shumë shqetësim, solidaritet me  të arrestuarin, përkrahje dhe dhembje. Edhe unë jam një nga ata që e kam ndjerë këtë dhembje, ashtu siç kam ndjerë përbuzje dhe  neveri të skajshme  për të gjithë ata që kanë urdhëruar një  arrestim të tillë. Mjerimi në fakt është krejt i tyre dhe assesi i atij mbi të cilin rëndojnë prangat më të paarsyeshme dhe më të padrejta.
Arrestimi ironikisht bëhet në ditën e lirisë së Kosovës. 11 vjet më parë  forcat e NATO-s çlirojnë Kosovën nga  dhuna, terrori dhe pushtimi serb , ndërkohë që  në  Prishtinë dhe kudo festohet, një ëndërrimtar dhe   sakrifikues i lirisë  gjendej ende  në  birucat torturuese të pushtuesve. Ai quhej thjesht Albin Kurti dhe kishte vetëm një mision  të sinqertë brenda vetes : Lirinë dhe pavarësinë e Kosovës.  U lirua pas protestave të shumta, pas këmbënguljes së faktorit ndërkombëtar, pas presionit të gjithanshëm që iu bë autoriteteve serbe. Por u arrestua përsëri disa herë si një kundërshtar i paepur i nëpërkëmbjes së lirisë dhe pavarësisë, si njeri që nuk mund të bënte kompromis me të pavërtetën dhe  si një antikonformist i lindur. Por duket etja për të burgosur një shpirt të lirë dhe  një “rebel” të pavarësisë  nuk eksitonte vetëm në  mendjen dhe strategjinë  militare serbe, por edhe tek ata shqiptarë që  ekzigjenca dhe personaliteti i Albinit dhe shokëve të tij u prishte rehatinë e qeverisjes dhe të pasurimit të paskrupullt, u trondiste pushtetin  dhe përfitimet e shumta e të paligjshme të cilat janë aq shumë dhe dihen gjithandej, sa kjo nuk mund të zgjidhet duke burgosur  denoncuesin  kurajoz .

Në se 12 qershorin  ish  drejtuesit e djeshëm të UÇK-së dhe  drejtuesit e sotëm të pushtetit kërkojnë ta festojnë  realisht dhe sinqerisht, nuk mundet kurrsesi të burgosin bash në këtë ditë një simbol të paqes e të rezistencës, një simbol të ndershmërisë e të përkushtimit qytetar,  një shpirt të lirë e të pastër. Absurd më të madh se ky nuk mund të ketë.
Por duket se  ata janë në krizë. Janë në krizën e korrupsionit, janë në krizën e mungesës së identitetit të tyre, janë në krizën e mosbesimit që ka populli për to, janë në krizën e mungesë së personalitetit të tyre. Janë në vargojt e shumë krizave dhe  arrestimi i Albimit tregon në fakt  reagim krize.  Ata nuk dinë çfarë të bëjnë, pasi shumë prej atyre që mbaheshin si idhuj janë përmbysur kokëposhtë dhe populli i tregon me gisht. I tregon jo vetëm si shkaktarët e  shitjes së interesave të Kosovës , por edhe si  hajdutë ordinerë që sillen si rrugaçë  zyrave të pushtetit.

Megjithatë  arrestimi i Albin Kurtit është sfida që nuk mund të fitohet. Llogaria është bërë më e gabuar se asnjëherë tjetër, pasi ai është një shpirt i lirë dhe i pathyeshëm, një shpirt që ka dhënë prova rezistence dhe ndershmërie . Ai i ka trembur aq shumë  urdhërdhënësit e arrestimit të tij, sa ata kanë humbur orientimin e qetësinë dhe kanë menduar se duke e burgosur çlirohen prej tij. Por kurrsesi nuk mund të jenë të çliruar mëkatarët. Ndërgjegjja e vrarë dhe e tradhtuar e një populli të varfër nuk do t’ua falë asnjëherë shëmtinë e një akti  të paprecedent  ndaj  një personazhi që vetëm lartësohet dhe kthehet në një frymëzim të vërtetë dhe të sinqertë, frymëzim që  Kosovës i ka munguar prej vitesh !