Lajmthirrje (versioni i fundit)

Nga Shkëlqim Çela

.

Të zhdukeshin celularët,

Njëqelizorët 

Në pellgjet e veshëve tanë gjithë paramecë,

Ameba, flagjelë, euglena të gjelbra,

Në pjata Petri ku bëjnë koloni 

Kqyrur mbi lamela nga lente kureshtjesh të vogla, 

Minutëse,

Mik-roskop-ike,

Të vinin prapë dinosaurët e mëdhenj,

Nga pyjet fshehës prapa shtëpive, livadhet

Me emra të harruar, lirishtë e ograja,

Të vinin me bulurimë

Fjalët e mëdha një napolon,

Mexhite në duar shpërblyese mbretërish veqilë,

Zhage verdhushkash në gji,

Fjalë e flori,

Pranë zemrës në jelekët razi 

Për xhamadanë fodullë,

Dëshira mustaqesh nën hundë 

Ku shkojnë të trembur minjtë

E përditës.

Kjo vjeshtë serioze gjithë pah saharoze

Në veshët e vreshtës shkumbi,

Ku rrushi dhe kumti kërkuan behar që të piqen,

Në lastarët e fjalës dhe këngës prerë shkurt

Shkurtit që shkurton urët,

Një fjalë që shpirtin këput

E bën nyje,

Muline në kryqin e fundit

Të botës që sillet rreth e rreth gjergjefit.

Alkool bërsishë nga një hektar vreshtë,

Në burg kadesh, si dy shenjtorët,

Mbyllur në shishe si djall e demon,

Mesazh e raki,

Flakë e fjali 

Flakur në det

Si e mira,

Fjalë e alkool me flakë blu

Në gojë e në gotë,

Në Gojgotë…

Me pritës zëlargu në vesh,

Oshëtima e murlanit në tela të vinte:

A më dëgjon? Si më dëgjon? Po më dëgjon? Aloooo…

Fjala – një fetus, kërthi

Të nxirrte kokën nga goja, zëlargu,

Mes veshit e trurit një qarje, mami,

Mugull i kumtit, një syrëz, një syth

Varësisht nga gjinia e Lajmit,

(Topat gjëmojnë në qoftë vajzë).

Të vinin edhe një herë 

Kthinat e lajmthirrjeve,

Kabinat e rënda orakull,

Lajmi,

(Ra Berlini, Saigoni, u ble Luiziana, u dogj Lusitania, u mbyt Titaniku… të dua… të dua mirë…)

Gërma të ish një kokërr perle

Rritur ngadalë në kapakët e gojëve,

Gjerdan i fjalisë të farfurinte 

Për qafa që çmerisin giljotinat e Fatit,

Telefonat me turbinë, 

Shkulma ujërash, Niagara stërpikëse,

Çentralistja me fisha

Tek ngulte destinin tënd në një vrimë të zezë

Në mes galaktikash.

T’më vinte edhe një herë sak një lajmthirrje!