Lirikë në PragDimër

Nga Vllasova Musta

Lirikë në PragDimër

Në këtë pragdimër

Ç'erë fryu,

Që tek unë të solli

Në fundvjeshtë?

Sapo nisim

Themi dy tri fjalë

Dhe pastaj,

Secili

Vetëm hesht.

Stinë vitesh ikën pambarim

Lamë pas

Lumenj,

Kaluam dete

Dhe një ditë

U ndodhëm rastësisht,

Si anije

Nga të tjerë planete.

S'kemi pasagjerë,

As sirena

Kapiten secili në anije!

Ngremë sytë

Diellin kërkojmë,

Sikur mbledhim rrezet

Fije, fije.

Flasim, 

Heshtim

Qetësisht tregojmë...

Asnjë gjë pa thënë 

Të mos mbetet!

Ç'ishte kjo puhizë si shkëndijë?!

Në fundvjeshtë

I përflaku detet.

Miqve të mij

Nëse ju them, 

Më mori malli,

Besojeni, atë që them

Malli,

Frymon si pjergull

Shtrin lastarët

Vjen e ju gjen.

Nëse drithërohem

Në mijëra shkëndija

Prania juaj

Tek unë sjell dritë

Dijeni,

Kjo i përket

Veç dashurisë.

E nëse

S´kam mall

S´kam drithërimë

Dhe as shkëndijë,

Dhe harroj të them: 

O njerëz, ju dua!

Merrni një qiri,

Dhe...

Ndizeni për mua!

Ora

Sot,

Gjithë ditën dola me nënën

U shndërrova në erë

Pa shkop magjik,

Pa fantashkencë

U buzëqeshja gjithë njerëzve

Pastaj,

Fare natyrshëm

Prekja dhe retë.

Isha me nënën sot,

Kur gjethet e vjeshtës

U përhapën në qiell

Sikur të ishin thërrmia dielli

Tek pija kafen me të

Pyesja veten:

Si mundi

Që erdhi?!

Me nënën isha

Edhe pse 

Prej vitesh ka shkuar

E s'është më!

Gjithë dritaret 

Qielli i hapi

Mua,

M'u duk, 

Sikur erdhi nëna

Dhe krahët m'i zgjati.

Kur mbrëmja mbuloi gjithçka

Nëna, 

Ish larguar

Dhe hëna dremiste

Mbi një majëmali.

...Kisha vënë në dorë 

Orën e saj,

Më kish marrë malli...