Cikël poetik nga Ahmet Selmani

Nga Ahmet Selmani 

Udha e Dëshpërimit

(ose gjetja e një shprese)

Udhës së dëshpërimit

i futa duart në një gërmadhë të frikshme

dhe gjeta veç një shpresë.

Premtimi i realizuar

(ose kanalizimi i popullit)

Pushtetari

me kravatë lëkure

e mban premtimin e dhënë

dhe popullit ia rregullon kanalizimin

për ta zbrazur lirshëm jashtëqitjen e vet

nga ëndrrat e thata që ka ngrënë çdo natë.

Piktura e përkohshme

(ose poezia për vjeshtën)

Një gjeth vjeshtak

është pikturë e përkohshme

që e di se do të kalbet nga shiu

dhe do të mbetet send i shëmtuar

ndaj shpejt struket në kujtesën time

që të jetojë gjatë me bukurinë e vet

të mburret edhe me mbijetesën

madje edhe të shndërrohet

në poezi për vjeshtën.

Urrejtja e Lumenjve

 (ose shikimi pa u prekur)

Sonte i urrej

të gjithë lumenjtë

që na hyjnë në mes si thikë

dhe na bëjnë të dukemi si dy brigje

që e shohin njëri-tjetrin nga larg pa u prekur.