Absurd

ABSURD

akëcilit

s`i vihet gishti në ballë

në qarkun e zjarreve të padukshme

brenda kërkimit nëpër historitë e pashkruara vetjake

guri i prehjeve me gjarpër

të shtatë moshat u dashka t`i kalojë alkimia

të pagëzohet një udhëtim

e të prekësh pastaj me dorë fundin e kuptimit

të të velet një udhë në rethin vicioz

një hap prapa të shpëtuarve

me rrëfime makabre që edhe zotin përlotën

e uratën e përballjes s`e solli kush pa hidhërimin e erës deri më sot

veç për një sezonë halli u nisën legjendat e rënieve të kënduara

një hap prapa të shpëtuarve

nismëtarët e sprovës pësuan si kurrë më parë

e që të mos arrijsh fundudhën e ëndjeve plakura

aq ftohtë ta bëjnë në mitin e kupolës me caqe të mëdha

nëpërkëmbë të lidhet përtej kufirit haku njerëzor

me zhmatje butësie

ikni me varkën e parë të Noes

mos i jepni kësaj udhe më shumë.

ALIBI

ujvarre helmi përdredhin syprinën e virgjër me të çmendur

në prehje vrasin amshimin

e shetiten të lirë

me alibinë e fqinjësisë së papastër

imazhe të kurdisura gërxhelësh frymojnë

sipas forcës së zhurmës

hapësirave të vetmura subtile të qenieve mërguara me lot

Gogolët e ceremonive

mbi kokat e të duarlidhurve

i kapin të përjetshme kryevendet e huaja

boshatisjet e gjurmëve të gjalla jetësorë në bredhje

i kapin të përjetëshme

grishjet e hijeve të cunguara të smirës.

* * *

Afat njeriu

sa të njohur

në vargan të pafund zgjatojnë festuesit

që t`a vdesin një legjendë

me ndërgjegje të ftohur trokasin si kusarë

anembanë pacipës

hukatin kobe makabre në të njëjtat caqe edhe ku hanë

lëpirës të padhëmbë në pelegrinazhe të huaja jetësh

me rastësi të planifikuara në bujtina

sa të njohur

shalojnë si karikatura ngushëllimi në pritje të një aksidenti

e shtirren lypsarë amebat me delikatesë profesioniste, plaçkitësit

tredhin në përkryerje mendjet bashkëkohore të vdektarëve

e nuk trishtohen me radhën e tyre të harlisjes

mëshirën e tallin të verbër

dyerve në varganë të pafund në guzhma të huaja

mjeshtër të mbetjeve janë

me fryerje kapen pas dyertrokitjet e qorrave

aty kanë gjetur afat njeriu

me role amorfe.

© Ibrahim Kazimi