Shtëpia në lëngim

Nga Nurie Emrullau

Rutinë

shtëpia 

tashmë është në vitet e lëngimit.

myshku i ngjitur

shtëpisë nga cepi në cep,

si mbulesa e hedhur

mbi trupin e atij që fle.

dielli nuk ia pjek më ballin asaj...

a thua se mali rriti shtatin kaq shpejt?

apo dielli iku në një anë që s'di nga të 

kthehet prapë?

shtëpia 

është plakur prej frazave të njëjta,

shkallët hipin dhe zbresin të njëjtat këmbë

që asnjëherë nuk patën guximin t'i kalojnë nga dy përnjëherë.

shtëpia po lëngon.

luledelet nuk çelën rreth saj,

sepse pranvera nuk kalon më këndej.

në shtëpinë që po lëngon,

veç hana kupton çfarë po ndodh,

po kur ajo vjen pranë nesh,

asnjë yll atë natë nuk ndez.

ku është fshehur dielli, ku janë zogjtë,

si ta njohim jetën kur ajo të vi? 

si të ngjallemi prapë?

* * *

Kthehem këtu për të të gjetur

Por asgjë nuk mbeti pasi ti shkove.

Kthehem këtu për të ndjerë erën e duhanit mbi gushë

Por asgjë nuk ka veç bishtash të vjetëruar cigaresh

Kthehem këtu për të ta dëgjuar zërin

Po asgjë s'dëgjoj pos këtij uji 

Që s'u ndal dhe pas ikjes tënde.

Kthehem këtu për të të gjetur

Dhe krejt çka gjejë është unë.

Dëshira t'marra

Un', pak gjana i du pi jetës.

Nâtën me u ba hânë...

Veç me ia ndrit rrugën hijes tânde.

E kur t'plasë mëngjesi,

Me qenë djell,

E me u kthye n'dritë.

Me ta ngroh at' copë shpirt.

Prej dielli me u ba ajr.

Prej ajri 

me u kthye n'erë.

Me u përzi nëpër flokun tand, nëpër mendjen tande...

Me u ba mjegull

E me u kthye n'shi.

Me ta lag jo veç trupin po dhe shpirtin me ta la.

Me qenë borë,

E me e ngroh tokën veç me bardhësinë time...

Me t'i zbut ty kambët që t'janë vra nëpër jetë..

Me qënë hânë, djell e ajr.

E me u kthye n'trup.

Me u taku ndoshta pak të dy.

Ma vonë.

Natën.

N'errësirë.

Du.

Me u kthye n'flutur

E me vallzue përreth llambës,

Që na ndrit ma shumë se hâna 

E n'groh ma shumë se djelli..

E me u djeg.

Me u djeg duke vallzue rreth saj...

Tu të pa.

Tu të pa ty ndë sy.

E shef? 

Pak gjana du pi jetës.

Me qenë yll, 

me u shue.

Me ra prej qielli

Me t'u plotësu ty nji dëshirë...